སེམས་སོང་གི་ཁྱོད། 

ལས་དབང་གིས་འཕྲད་དེ། 

ཆོས་ཉིད་ཀྱིས་བྲལ། 

ཡིན་ནའང་། 

ང་ཡི་ཞེ་སེམས་ལ།

ཁྱོད་ཉིད། 

མར་ཁུ་བཞིན་འཁྱིལ། 

སྨུག་པ་བཞིན་འཐིབས། 

དྲན་གདུང་གི་གསེབ་ཏུ། 

གཅིག་བརྩེགས་ཉིས་བརྩེགས་བྱས་ཏེ། 

ཁྱོད་ཀྱི་རྣམ་པ་དང་། ཁྱོད་ཀྱི་བཞིན་མདངས། 

ཁྱོད་ཀྱི་འཛུམ་མདངས་ཀྱི་ཉམས་འགྱུར་རེ་རེ།

ངའི་མིག་ལམ་དུ་ག་ལེར་རྒྱུ་ན། 

ངས་ཁྱོད་ཀྱི་མིང་ནས་བཟུང་སྟེ།

སྐད་གསང་མཐོན་པོས་ཀི་རྒྱང་གིས་འབོད་ན་བསམ། 

ཁྱོད་དང་བྲལ་བའི་སེམས་ཁམས་འདིས།

ང་རང་ཉིན་འདི་གར་ལྡབ་བེ་ལྡིབ་བེ་ཞིག་ཏུ་གྱུར་བས། 

འཇིག་རྟེན་འདི་ནི། 

ང་ལ་མཚོན་ན་སྟོང་སང་ངེ་བ་དང་།

མནར་གཅོད་ཅིག་ལས་ཅི་ཡང་མིན་པ་འདྲ། 

བདག་གི་སྙིང་ཉེ་བའི་སེམས་སོང་གི་ཁྱོད། 

ལས་དབང་གི་བགོ་སྐལ་ཞིག་ལྷག་ན། 

ངས་ང་གཉིས་ཀྱི་རེ་སྨོན་དེ། 

མངོན་འགྱུར་བྱུང་བར་སྨོན་ལམ་རྒྱག་ངེས་ཡིན།