ཡངས་པའི་མཁའ་ལམ་དབུས་སུ། །

ཆུ་འཛིན་གྲོལ་བའི་གསེབ་ནས། །

ཁེར་རྐྱང་བཅོ་ལྔའི་ཟླ་བའི། །

ཟུར་མིག་འོད་ཀྱི་དཀར་མདའ། །

སྒེའུ་ཁུང་ནང་ནས་འཛུལ་བྱུང་། །

འུར་ཟིང་རྒྱུ་སྐར་ཁྲོད་ནས། །

རྩེད་རོགས་མེད་པ་རེད་དམ། །

ཡང་ན་ཁེར་རྐྱང་བགྲོད་དུས། །

སེམས་དེ་སུན་པ་མིན་ན། །

ལྐོག་བལྟ་བྱེད་དོན་ཅི་ཡིན། །

དེ་དག་གང་ཡང་མིན་ན། །

ཡིད་འོང་ཟླ་བ་ལྷ་མོས། །

བརྩེ་བས་བདག་ལ་གཟིགས་ཏེ། །

མ་ལུས་མཆོག་གི་དངོས་གྲུབ། །

ཅི་དགར་གནང་བ་ཡིན་ནམ། །

དེ་མིན་མཚན་གུང་འདི་ལ། །

བདག་ཀྱང་མཚན་གཉིད་མི་ཁུག །

གནས་ཚུལ་ཟླ་བས་རྟོགས་ནས། །

དཀར་གསལ་བཅོ་ལྔའི་ཟླ་བ། །

སྙིང་གཏམ་གསུང་བར་ཕེབས་སམ། །

གཞན་ཡུལ་རྒྱང་རིང་མཛའ་མོའི། །

དུང་སེམས་ཟླ་བར་བརྫུས་ཏེ། །

རི་ཆུ་སྟོང་ཕྲག་བརྒལ་ནས། །

མཚན་ལྗོངས་ཁོ་བོའི་རུམ་དུ། །

ག་ལེར་འཛུལ་བ་རེད་དམ། །

མདོར་ན་མཚན་གུང་ཟླ་བའི། །

བསམ་ཚུལ་རྟོགས་ཐབས་མེད་ཀྱང་། །

གནམ་ས་གཉིས་ཀྱི་བར་ནས། །

དམ་ཚིག་འོད་ཀྱིས་མཐུད་དེ། །

ཕན་ཚུན་དྲན་གདུང་གླེང་ཡོད། །

འགྲོ་རོགས་སྨིན་དྲུག་ཁྲ་མོར། །

གསང་གཏམ་ཡེ་ནས་མ་བཤད། །

ལེ་དབར་ཁྲི་ཡིས་ཆོད་ཀྱང་། །

ངལ་བའི་གདུང་བ་ཁུར་བཞིན། །

སྙིང་གཏམ་ང་ལ་བཤད་བྱུང་། །